ភ្នំពេញ៖ គណបក្សប្រជាជនកម្ពុជាបានបោះឆ្នោតជ្រើសតាំងសមាជិកគណៈកម្មាធិការកណ្ដាលបន្ថែមចំនួន ៤៩៦រូប នៅរសៀលថ្ងៃទីសៅរ៍ ទី៩ ខែធ្នូ ឆ្នាំ២០២៣នេះ។
ការបោះឆ្នោតជ្រើសតាំងសមាជិកគណៈកម្មាធិការកណ្ដាលបន្ថែមនេះធ្វើឲ្យចំនួនសមាជិកកើនឡើងដល់ ១ ៣១២រូប។
យោងតាមសម្លេងឆ្នោត នៅល្ងាចថ្ងៃទី៩ ខែធ្នូ នេះ សមាជិកសន្និបាតចំនួន ៣ ១២៥រូប បានសម្រេចបោះឆ្នោតគាំទ្រដល់ការដាក់បញ្ជូលសមាជិកគណៈកម្មាធិការកណ្ដាល ៤៩៦រូប ដោយសំឡេងយល់ព្រម ៣ ០០៧សន្លឹក ស្មើនឹង ៩៦,២២% នៃសន្លឹកឆ្នោតសរុប។
បេក្ខជនដែលជាសមាជិកគណៈកម្មាធិការកណ្ដាលគណបក្សនេះត្រូវបានវាយតម្លៃថាមានគោលជំហរស្មោះត្រង់ មានស្មារតីតស៊ូការពារ និងហ៊ានធ្វើពលិកម្មដើម្បីបុព្វហេតុរបស់គណបក្ស ផលប្រយោជន៍ជាតិ និងប្រជាជន។
បន្ថែមលើនេះបេក្ខជន មានការយល់ដឹងអំពីទស្សនៈ គោលជំហរ មាគ៌ានយោបាយ អាចរួមយោបល់ក្នុងការកសាងគោលនយោបាយរបស់គណបក្ស និងមានសមត្ថភាពចាត់ចែងអនុវត្តដោយជោគជ័យនូវគោលការណ៍ គោលនយោបាយ និងសេចក្តីសម្រេចចិត្តនានារបស់គណបក្ស ថែមទាំងមានស្មារតីគោរពវិន័យ និងការចាត់តាំងរបស់គណបក្ស ថែរក្សាសាមគ្គីភាព ឯកភាពផ្ទៃក្នុង មានឥទ្ធិពលល្អក្នុងគណបក្ស បានទទួលការគាំទ្រពីអង្គការចាត់តាំង និងសមាជិកគណបក្ស និងមានទំនាក់ទំនងល្អ ធ្វើអំពើល្អជាមួយមហាជនប្រជាជន។
គួរឲ្យដឹងផងដែរថា ការបោះឆ្នោតនេះធ្វើឡើងក្នុងមហាសន្និបាតវិសាមញ្ញតំណាងទូទាំងប្រទេសរបស់បក្សប្រជាជន រៀបចំចំនួន ២ថ្ងៃ ពីថ្ងៃទី៩ ដល់ថ្ងៃទី១០ ខែធ្នូ ឆ្នាំ២០២៣ ដោយមានសមាជិកគណៈកម្មាធិការកណ្តាលចូលរួមមានចំនួន ៧៣៩នាក់លើបរិមាណនៃរចនាសម្ព័ន្ធរួម ៨៦៥រូប និងមានសមាជិកទូទាំំងប្រទេសចូលរួមប្រមាណជា ៣ ៦០០នាក់៕
